D Sittlisalp gheert zu dä greeschtä Alpä im Kanton Üri und liit oberhalb vu Underschächä uf 1600 Meter uber Meer am Chläüsäpass. Bewirtschaftet wird diä Alp vun ärä Sännägnossäschaft, wo üs niin Familiäbetriibä zämägsetzt isch. I dr Chääserii wärdet vu agähnds Jüni bis Ändi Septämber täglich bis nooch a 3400 Kilo Milch vu rund 200 Chiänä verschaffet.

Bsunders schtolz isch diä privati Gnossäschaft uf das äiggnig Wasserchraftwärch mit ärä Läischtig vu 25 kWh. Mit derä Irichtig cha d Umwältbelaschtig usinnig chlii ghaltä wärdä.

Verchäüft wird dr Alpchääs und witeri Produkti wiä Ziger, Nitlächääsli, Jogurt oder Alpäankä im regionalä Detailhandel und a Privatchundä. Uber das üsä chennet d Wanderer und d Üsfliggler bim äigänä Alpbäizli alli diä Produkti zum Ässä bschtellä und diä äü chäüfä.